ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен мектеп бітіруші түлектерге арналған кәсіби бағдар беру іс-шарасы өтті. Кездесу NEET санатындағы жастарды қолдау, жұмыссыздық деңгейін төмендету, жастардың кәсіби бағдарын айқындау және еңбек нарығына бейімдеу бағытындағы жоба аясында ұйымдастырылды.
Іс-шараның басты мақсаты – түлектерге болашақ мамандығын саналы таңдауға көмектесу. Кездесу барысында оқушыларға мамандық таңдауда жеке қызығушылықтары мен қабілеттерін ескерудің, еңбек нарығындағы сұранысты зерделеудің және кәсіби дамуды алдын ала жоспарлаудың маңызы түсіндірілді.
Жиында «Жастар ресурстық орталығы» КММ басшысы Жансерік Бауыржанұлы Жұман сөз сөйлеп, мектеп бітіруші жастар үшін мамандық таңдаудың жауапты кезең екенін атап өтті. Ол оқушыларды өз мүмкіндіктерін бағалап, білім алуға ұмтылуға, алдына нақты мақсат қойып, сол мақсатқа жету жолында жүйелі жұмыс істеуге шақырды.
Оқушыларға арналған интерактивті ойын мен тренинг ұйымдастырылды. Профориентолог Ақан Сәбитұлы Бесбаев кәсіби бағдар беру бойынша тренинг өткізіп, қатысушыларға өздерінің қызығушылықтары мен қабілеттерін анықтауға көмектесті. Тренинг барысында мамандық таңдауда эмоцияға ғана емес, жеке бейімділікке, кәсіби мүмкіндіктерге және болашақтағы даму перспективаларына да назар аудару қажеттігі айтылды. Интерактивті тапсырмалар оқушылардың белсенділігін арттырып, өз болашағы туралы ойлануына мүмкіндік берді.
Білім алу және грант мүмкіндіктері туралы ақпарат берілді. Кездесуге қатысқан профориентолог, грант-аналитик әрі Gallup сарапшысы Рамазан Нұрланұлы Бексейт білім беру мүмкіндіктері мен гранттар жөнінде мәліметтермен бөлісті. Ол түлектердің жоғары оқу орындары мен білім беру бағыттарын таңдауда қолда бар мүмкіндіктерді зерделеп, алдағы қадамдарын алдын ала жоспарлауының маңызын түсіндірді.
Мұндай кездесулер мектеп бітірушілердің кәсіби таңдау жасауына қолдау көрсетіп қана қоймай, олардың болашаққа деген сенімін арттыруға да ықпал етеді. Жастардың қабілетін ерте анықтап, білім мен еңбекке бағыттау – олардың қоғам өміріне белсенді араласуына және тұрақты жұмыспен қамтылуына жол ашатын маңызды қадам.
«Жастар ресурстық орталығы» жастарға қолдау көрсету, кәсіби бағдар беру және олардың әлеуетін дамыту бағытындағы жұмыстарды жалғастырады.
