ADYM.KZ / Шымкент қаласы Жастар саясаты басқармасының «Жастар ресурстық орталығы» КММ-нің ұйымдастыруымен «Авимед» көпсалалы колледжінде «Буллингтің алдын алу және оның зардаптары» тақырыбында кездесу өтті. Іс-шараның мақсаты – жастардың буллинг туралы түсінігін кеңейту, оның алдын алу жолдарын түсіндіру және интернет кеңістігіндегі қауіп-қатерлерден сақтану мәдениетін қалыптастыру.
Кездесу барысында қатысушыларға буллинг ұғымы, оның негізгі түрлері мен адамға тигізетін кері әсері туралы ақпарат берілді. Мамандар қатарластарын кемсіту, қорқыту, мазақ ету, әдейі шеттету сияқты әрекеттердің адамның психологиялық жағдайына, өзіне деген сенімділігіне және айналасындағылармен қарым-қатынасына кері ықпал етуі мүмкін екенін түсіндірді. Мұндай жағдайларға бейжай қарамай, мәселені дер кезінде анықтап, тиісті мамандардан көмек сұраудың маңызына назар аударылды.
Сонымен қатар интернет кеңістігіндегі қауіпсіздік мәселелері қозғалды. Жастарға киберқылмыс пен интернет алаяқтықтың алдын алу жолдары түсіндіріліп, желіде жеке деректерді қорғау, күмәнді сілтемелерге өтпеу және белгісіз адамдарға құпия ақпарат бермеу қажеттігі айтылды. Әлеуметтік желілер мен мессенджерлерді пайдалану кезінде сақтық таныту, күмәнді хабарламаларға сенбеу және жеке мәліметтерді жариялауға жауапкершілікпен қарау жөнінде түсінік берілді.
Тақырыпты кеңінен ашып, ақпаратты көрнекі түрде жеткізу мақсатында қатысушыларға арнайы бейнеролик көрсетілді. Оның мазмұны арқылы жастар буллингтің түрлі көріністері мен интернеттегі қауіп-қатерлер туралы қосымша мағлұмат алды. Кездесу жастардың өзара сыйластықты сақтауы, өзгелердің жеке шекарасын құрметтеуі және қиын жағдайға тап болған адамға қолдау көрсетуі қажеттігін түсіндіруге бағытталды.
Іс-шараға «Жастар ресурстық орталығы» Психологиялық көмек көрсету бөлімінің маманы Сайдахан Жібек Мұратқызы және Шымкент қаласы Полиция департаменті Киберқылмысқа қарсы іс-қимыл басқармасының жедел уәкілі, полиция капитаны Бахытжан Тұрсынбаевич Бекбаев қатысты. Мамандар жастарға психологиялық қауіпсіздік пен цифрлық сауаттылықтың маңызын түсіндіріп, құқық бұзушылықтың алдын алуға қатысты ақпарат ұсынды.
Осындай кездесулер жас буынның құқықтық және цифрлық сауаттылығын арттыруға, буллингке қарсы көзқарас қалыптастыруға және қауіпсіз әлеуметтік орта құруға бағытталған. Буллингтің алдын алу – тек бір адамның немесе белгілі бір мекеменің міндеті емес, ол қоғамның ортақ жауапкершілігі.
