Батыс Қазақстан облысында республикалық маңызы бар тас жолда ірі жол апаты болды. Жол-көлік оқиғасы салдарынан бір адам қаза тауып, тағы екі адам зардап шекті, — деп хабарлайды ADYM.KZ Tengrinews.kz сайтына сілтеме жасап.
Полицейлер апат 30 қаңтарда таңертең сағат 10.30-да Орал-Атырау тас жолында болғанын хабарлады. Алғабас ауылының маңында Lada Granta, Volkswagen Passat, Toyota Camry, ВАЗ-2114, Chevrolet Aveo автокөліктері соқтығысқан.
«Жол апаты салдарынан Lada Granta автокөлігінің жолаушысы қаза тапты, одан басқа зардап шеккен екі адам бар. Жол-көлік оқиғасының себептері анықталып жатыр. Бірқатар сараптама тағайындалды», — деді БҚО ПД ресми өкілі Болатбек Белгібеков.
Айта кетейік, өңірде жыл басынан бері 12 жол-көлік оқиғасы тіркелген. Жалпы бес адам қайтыс болды.
