Бұл мереке 2003 жылы Мемлекет басшысының Жарлығымен бекітіліп, содан бері қазақстандықтарды салауатты өмір салты, рухани беріктік және патриотизм құндылықтары төңірегінде біріктіретін дәстүрлі әрі маңызды оқиғаға айналды.
Спорт — армия өмірінің ажырамас бөлігі
Қазақстан Қарулы Күштері үшін дене дайындығы – тек физикалық төзімділікті қалыптастыру құралы емес, сонымен қатар кәсіби шеберлік пен жауынгерлік рухты шыңдаудың маңызды тетігі болып табылады. Қорғаныс министрлігінің құрылымында жұмыс істейтін Армия орталық спорт клубы бүгінде 20-дан астам спорт түрін дамытып келеді.
Биыл елімізде армия спортының жаңа кезеңі басталды. Алматы қаласында ашылған Бауыржан Момышұлы атындағы әскери-спорт колледжі болашақ чемпиондар мен әскери спорт шеберлерін даярлауға арналған бірегей білім беру және жаттығу алаңына айналды.
Балалар спорты – басты назарда
Қорғаныс ведомствосы әскери қызметшілердің балаларына да ерекше көңіл бөлуде. Қазіргі таңда еліміздің сегіз гарнизондық спорт кешені мен үш оқу-жаттығу орталығында 7 000-нан астам бала спортпен тегін шұғылдануда. Балалар дзюдо, қазақ күресі, самбо, бокс, шағын футбол, үстел теннисі, шахмат, дойбы, тоғызқұмалақ және басқа да спорт түрлерін меңгеруде. Бұл – олардың физикалық дамуымен қатар, отансүйгіштік рухта тәрбиеленуіне де ықпал ететін маңызды әлеуметтік бастама.
Халықаралық ареналардағы жетістік
Армия спортшылары Қазақстанның халықаралық беделін арттыруға да зор үлес қосып келеді. 2024 жылы Парижде өткен Жазғы Олимпиада ойындарында Қорғаныс министрлігінің құрамасы 11 спорт түрі бойынша 21 спортшымен ел намысын қорғады. Қазақстан қоржынына түскен 7 медальдің 4-еуі дәл осы әскери спортшыларға тиесілі болды. Күміс жүлде иегерлері — гимнаст Нариман Құрбанов пен балуан Демеу Жадыраев, Қола жүлдегерлер — дзюдошы Ғұсман Қырғызбаев пен спорттық атыс шебері Ислам Сәтбаев. Бұл жетістіктер – жүйелі дайындық пен әскери спорт мектебінің мықтылығын дәлелдейтін айқын көрсеткіш.
Ұлттық спорт – ұлт рухы
Армия спортында ұлттық спорт түрлеріне де айрықша мән беріледі. Жуырда өткен қазақ күресінен әскери қызметшілер арасындағы алғашқы әлем чемпионатында Қазақстан құрамасы сенімді жеңіске жетіп, 8 алтын, 6 күміс және 2 қола медаль жеңіп алды. Турнирдің жоғары деңгейде ұйымдастырылуы мен қазақстандық палуандардың шеберлігі халықаралық сарапшылардың жоғары бағасына ие болды.
Нәтижесінде, Халықаралық әскери спорт кеңесі (CISM) қазақ күресін жыл сайынғы әскери әлем чемпионаттары мен Дүниежүзілік әскери ойындардың ресми бағдарламасына енгізу мүмкіндігін қарастыруда. Бұл – ұлттық спорттың халықаралық деңгейде мойындалуы жолындағы маңызды қадам.
Жаппай спорттық іс-шаралар өтті
Спорт күніне орай Қарулы Күштердің барлық гарнизондарында бұқаралық спорттық жарыстар мен турнирлер ұйымдастырылды. Әскери қызметшілер, курсанттар, кадеттер, сондай-ақ олардың отбасы мүшелері қатысқан шаралар арасында әскери эстафеталар, шағын футбол, арқан тарту, жеңіл атлетика, шахмат турнирі және күштік жаттығулар бойынша жарыстар өтті.
Бұл шаралар жауынгерлік даярлықпен қатар, ұжымдық рухты күшейтіп, салауатты өмір салтын насихаттау мақсатында өткізілді. Сондай-ақ спорттық мерекелер аясында әскери бөлімдерде үздік спортшылар марапатталып, жас қызметкерлерге үлгі боларлық кездесулер мен шеберлік сабақтары өтті.
Қорытындылай келе, Спорт күні — әскери ортадағы дене мәдениеті мен патриоттық тәрбие арасындағы тығыз байланыстың көрінісі. Армия спорты еліміздің қорғаныс қабілетін арттырумен қатар, жастарды ерлікке, табандылыққа және елжандылыққа тәрбиелеуде маңызды рөл атқарып келеді.
