Сарыағаш ауданында сыйымдылығы 200 орындықты құрайтын жекеменшік «Рахима О.Р» ЖШС зияткерлік бастауыш мектебі ашылды.
Ашылу салтанатына аудан әкімінің орынбасары Н.Талипов, аудандық мәслихат хатшысы С.Тасқұлов, ардагер ұстаз С.Мырзабаев, ардагерлер кеңесінің төрағасы М.Сүлейменов, кәсіподақ төрағасы Ә.Тастанбеков арнайы қатысып, мектептің ашылуымен құттықтады.
Мектеп құрылтайшысы Рахымберді Оспанов мектептің ашылу салтанатында мектеп директоры Л.Рысбековаға мектептің кілтін табыстады.
Аталған мектеп үкіметтік тапсырыс аясында қаржыландырылады. Мектепте оқушылар тегін білім алады және бір мезгіл ыстық тамақпен қамтылған. Мектепте асхана, жаттығу залы, спорт алаңшалары қарастырылған. Сондай-ақ мектепте заманауи үлгідегі үлкен экранды электронды тақта және компьютерлік құрылғылар, мультимедиа кабинеттері, акт залы, балалардың қауіпсіздігін қамтамасыз ету үшін бейнебақылау камералары қарастырылған. Сонымен қатар білім ордасында балаларға арналған жатақхана қарастылған.
Зияткерлік мектебінде математика пәніне басымдық беріліп, тереңдетіліп оқытылады. Оқушыларды сапалы біліммен қамту мақсатында ең білікті, шебер ұстаздар жұмысқа тартылған.
