Орал қаласында шағын кәсіпорындардың бірінде болған өртті сөндіру кезінде төтеншеліктер жедел қимылдап, ықтимал жарылыстың алдын алды деп хабарлайды ADYM.KZ Egemen.kz басылымына сілтеме жасап.
9-қаңтарға қараған түнгі сағат 3-тен 14 минут өткенде Орал қаласының Жәңгір хан көшесі бойындағы «Хазар»кемпингі аумағында өрт шыққаны туралы суыт хабар жеткен болатын. Тілсіз жау кемпинг аумағындағы қосалқы үй-жайда,екі қабатты шиномонтаж ғимаратында болған.
Оқиға орнына жедел жеткен төтеншеліктер жалпы ауданы 44 шаршыметрлік бөлмеде жеке заттар, пластикалық терезе жақтаулары, тұрмыстық техникалар жанып жатқанын көрген. Ең қиыны – ғимарат ішінде жарылу қаупі бар жоғары қысымды балон көп екен. Өрт сөндірушілердің ұтымды іс-қимылының арқасында оқиға орнынан 4 оттегі, 4 пропан балоны және фреоны бар 14 балон (хладагент) қауіпсіз жерге шығарылды.
Батыс Қазақстан облыстық Төтенше жағдайлар Департаменттің 7 жеке құрамы, 3 техникасы жұмылып, шеберханада өрт түнгі сағат 04.38.-де толығымен сөндірілді.
