Семей қаласындағы әскери бөлімнің коменданттық взводында электригі қызмет атқаратын қатардағы жауынгер Қызыр Мұхаметжанов өз өмірін қауіпке тігіп, отқа оранған үйден әйел адамды құтқарып алып шықты. Бұл ерлік оқиға 10 маусым күні кешкі уақытта орын алды және оның батылдығы көпшіліктің алғысына бөленді.
Аталмыш күні Қызыр Мұхаметжанов дүкенге бара жатқан кезде, қала көшелерінің бірінде өрт сөндіруге ұмтылған адамдар тобын байқайды. Жанып жатқан ғимараттың терезелерінен шыққан жанұшыраған айқай да оны дереу әрекет етуге итермеледі.
Еш ойланбастан оқиға орнына жегіліп жеткен әскери қызметші қоршауды айналып өтіп, оттың әсерінен сынған терезенің әйнегін лақтырды да, қатты түтінге толы бөлмеге кірді. Көзі көрмегендіктен, ол әйелдің даусына құлақ түріп, оның орнын анықтады. Қызыр Мұхаметжанов жанындағы барлық қиындықтарға қарамастан, әйелді таба салып, оны аман-есен сыртқа алып шықты.
Жедел медициналық жәрдем қызметі әйелді тез арада Семей қаласындағы ауруханаға жеткізіп, қажетті емін бастады. Қазіргі таңда зардап шеккен адам дәрігерлердің бақылауында және ем қабылдауда.
Қызыр Мұхаметжанов – екі баланың әкесі, әскери қызметте он жылдан астам уақыт бойы келісімшарт бойынша қызмет етіп келеді. Ол өз әрекетін батырлық деп санамайтынын айтады, өйткені қиын сәтте қол ұшын созу әр азаматтың борышы екеніне сенімді.
– «Менің іс-әрекетім – әр адамның адамгершілік және азаматтық парызы. Әскери қызметте қалыптасқан тәртіп пен тәрбие маған жедел әрі батыл шешім қабылдауға көмектесті. Қиын жағдайларда қас қағым сәтте әрекет ету – әскери өмірдің бір бөлігі», – деп бөлісті қатардағы жауынгер.
Бұл оқиға Қарулы күштер қатарындағы әскери қызметшілердің қоғам алдындағы жауапкершілігі мен азаматтық борышты сезінуінің жарқын үлгісі болып табылады. Қызыр Мұхаметжановтың ерлігі – еліміздің қауіпсіздігі мен тыныштығын сақтау жолындағы қызметкерлердің кәсіби әрі адамгершілік қасиеттерінің айғағы.
