Бұл бастама – әскери қызметтің беделін көтеруге, жастарды кәсіби дамытуға, сондай-ақ әскери борышын өтеген азаматтарға жаңа өмірлік мүмкіндіктер ұсынуға бағытталған маңызды әрі тың қадам.
Грант иегерлерін іріктеу процесі
Конкурстық іріктеуге Қазақстан Республикасының Қарулы Күштері, Мемлекеттік күзет қызметі, Төтенше жағдайлар министрлігі, Ұлттық қауіпсіздік комитетінің Шекара қызметі және Ұлттық ұлан құрылымдарында белгіленген мерзімде әскери қызмет атқарған 17 500-ден астам сарбаз қатысты. Іріктеу үдерісі ашықтық пен әділдік қағидалары негізінде арнайы құрылған «Sarbaz 2.0» ақпараттық жүйесі арқылы жүргізілді. Бұл жүйеде барлық әскери бөлімдер тіркелген және сарбаздардың қызмет барысындағы үлгерімі, тәртібі мен жауынгерлік даярлығы нақты бағаланып, ескерілді.
Бөлінген гранттар мен оқу орындары
2024 жылы мерзімді әскери қызметін аяқтағандарға арналып Қазақстан Республикасы Ғылым және жоғары білім министрлігі тарапынан төмендегідей мемлекеттік білім гранттары бөлінді: Азаматтық жоғары оқу орындарына – 2010 грант; Қорғаныс министрлігінің әскери оқу орындарына – 253 орын; Ұлттық ұлан академиясына – 36 орын; ҰҚК Шекара қызметі академиясына – 12 орын; Төтенше жағдайлар министрлігінің оқу орнына – 3 орын
Грант иегерлері ҰБТ тапсырмай-ақ жоғары білім алуға мүмкіндік алды. Сонымен қатар, олар мемлекеттік шәкіртақы, тегін жатақхана, әскери кафедраға конкурссыз қабылдану сияқты қосымша жеңілдіктерге де ие болады.
Талапкерлердің таңдауы мен мамандықтар
Грант иегерлері арасында биылғы жылы сұранысқа ие жоғары оқу орындарына мыналар енді: Astana IT University; Әл-Фараби атындағы Қазақ ұлттық университеті; Л.Н. Гумилев атындағы Еуразия ұлттық университеті; Қ.И. Сәтбаев атындағы Қазақ ұлттық техникалық зерттеу университеті
Бұл университеттер әскери қызметтен кейін кәсіби дамуды көздеген жастар арасында ең көп таңдалған жоғары оқу орындарының көшбасына шықты. Бұл жастардың білім мен технологияға деген ұмтылысын және отандық ғылым мен техниканың дамуына үлес қосуға деген құлшынысын білдіреді.
Ең танымал мамандықтар
Грант иегерлері арасында сұранысқа ие мамандықтар қатарына төмендегілер енді: Ақпараттық технологиялар; Ақпараттық қауіпсіздік; Бағдарламалау; Киберқауіпсіздік; Электротехника және автоматика; Машина жасау мен техникалық қызмет көрсету
Бұл бағыттар қазіргі заманның сұранысына сай келетін, еңбек нарығында жоғары бағаланатын салалар болып табылады.
Жастарға бағытталған жаңа мүмкіндік
Мемлекеттік гранттармен білім алуға ие болған азаматтар үшін бұл тек кәсіби білім алу ғана емес, сонымен қатар өздерінің әлеуетін ашып, еліміздің дамуына үлес қосуға берілген үлкен мүмкіндік. Бұл бастама Қазақстан армиясында қызмет етудің жауапты әрі беделді іс екенін тағы бір дәлелдеп отыр.
Қорғаныс министрлігі алдағы уақытта да мерзімді әскери қызметін өткерген азаматтар үшін әлеуметтік қолдауды күшейту, білім мен мансаптық өсудің жаңа жолдарын ұсыну бағытындағы жұмыстарды жалғастыратын болады.
Жас сарбаздар үшін бұл бастама болашаққа жол ашатын маңызды белеске айналды. Ендігі міндет – берілген мүмкіндікті тиімді пайдаланып, ел игілігі үшін қызмет ету.
