Қазақстан Республикасының Қарулы Күштерінің болашағын қалыптастыратын маңызды кезеңдердің бірі – Сағадат Нұрмағамбетов атындағы Құрлық әскерлерінің әскери институтында мемлекеттік емтихандардың басталуы. Бұл кезең – курсантардың оқу үрдісін аяқтап, өз білімдері мен дағдыларын жан-жақты және объективті түрде көрсетуге мүмкіндік беретін маңызды сынақ болып табылады.
Мемлекеттік емтихан сессиясының өткізілуіне Қорғаныс министрлігінен арнайы комиссия келіп, түлектердің даярлығын тексеруге жауапты болды. Комиссияның негізгі мақсаты – жас офицерлердің қызмет атқаруға толықтай дайын екендігін растау, олардың теориялық білімін, практикалық дағдыларын және тактикалық ойлау қабілетін жан-жақты бағалау.
Емтихан сессиясы «Әли» оқу орталығындағы саптық байқаудан басталды. Бұл шараға қатысқан курсанттар сымдай тізіліп, өздерінің келешек әскери қызметкерлер ретінде дайындық деңгейлерін көрсетті. Әскери тәртіп пен ұқыптылық, нақты әрі сенімді әрекет ету – мұның бәрі осы сынақ барысында ерекше назарға алынды.
Институт бастығы генерал-майор Бауыржан Ибатулин өз сөзінде:
«Еліміздің қорғаныс қабілеті жас офицерлерді оқыту сапасына тікелей байланысты. Олар – армиямыздың болашағы. Түлектер мұқият дайындықтан өтті. Енді өз білімдерін растайтынына және қойылған міндеттерді лайықты орындайтынына сенімдімін», – деді. Бұл сөздер жас сарбаздардың қол жеткізген жетістіктері мен олардың ел қауіпсіздігін қамтамасыз етудегі маңыздылығын ерекше атап өтті.
Сынақ барысында комиссия бірнеше негізгі аспектілерді мұқият бағалайды. Олардың қатарында: теориялық білімнің тереңдігі, практикалық әскери дағдылардың шеберлігі, тактикалық ойлау қабілеті және ең бастысы – ұрыс жағдайларына барынша жақын сценарийлерде салмақты шешім қабылдау қабілеті. Осындай кешенді бағалау жас офицерлердің күрделі және жауапты қызметке дайын екендігін көрсетеді.
Аттестаттау рәсімі сәтті аяқталғаннан кейін институт түлектері «лейтенант» алғашқы офицерлік атағын алып, Қазақстан Қарулы Күштерінің қатарына қосылады. Бұл – олардың әскери қызметтегі алғашқы қадамы ғана емес, сонымен қатар елдің қорғаныс әлеуетін арттырудағы жауапкершіліктің бастамасы.
Осылайша, Сағадат Нұрмағамбетов атындағы Құрлық әскерлерінің әскери институтындағы мемлекеттік емтихандар кезеңі еліміздің қорғаныс күштерін сапалы әрі кәсіби кадрлармен толықтыруға бағытталған маңызды шара болып табылады. Жас офицерлердің білімі мен дайындық деңгейін жоғары ұстау – Қазақстанның қауіпсіздігі мен тұрақтылығының кепілі.
