ТҮРКІСТАНДА ТҰҢҒЫШ РЕТ ДІНИ БАСҚАРМАНЫҢ ӨКІЛДІГІ АШЫЛДЫ (Фото)

Түркістан қаласында Қазақстан мұсылмандары діни басқармасы өкілдігінің ашылуы рухани қаланың өмірінде айрықша сипатқа ие екенін айтқан облыс әкімі бұл өнегелі істердің ұйытқысына айналар игі бастама болғалы тұрғанын жеткізді.                           
Жансейіт Түймебаев, Түркістан облысының әкімі:
— Қасиетті Ислам дінін қадір тұтып, өмірінің басты мақсатына айналдырған өңіріміздің әрбір мұсылманы үшін қуанышты осынау жаңалықпен сіздерді құттықтаймын. Қазақстан мұсылмандары діни басқармасының қасиетті де киелі Түркістанда тұрақты жұмыс жасайтын өкілдігінің ашылуы Ислам дінінің өркендеп өсуіне,  діңгегінің  нығая түсуіне оң ықпалын тигізетініне біздің сеніміміз мол.                                                      
Шарада сөз алған Қазақстан мұсылмандары діни басқармасының төрағасы, Бас мүфти, Серікбай қажы Ораз тарихи оқиға – Түркістан облысының дүниеге келуімен барша түркістандықтарды құттықтап, ашылып отырған басқарманың өкілдігі Ислам дінінің өркендеуі жолында жұмыс атқаратынын айтты.                                                             
Серікбай қажы Ораз, Қазақстан мұсылмандары діни басқармасының төрағасы, Бас (мүфти):
— Қастерлейтін киелі орын Қожа Ахмет Яссауи бабамыз және осы халқымыздың ең ардақтылары, ұлылары мен жақсылары мекен тепкен Түркістанда бүгін тағы да ерекше сәт. Елбасымыздың Түркістанды облыс орталығы ретінде және рухани һәм мәдени орталық ретіндегі даму игі бастамаларын қолдай отырып, Қазақстан мұсылмандары діни басқармасы төралқа және ғұламалар кеңесінің бір ауыз шешімімен мен өзімнің бірінші орынбасарым, Астанадағы Әзірет Сұлтан мешітінің бас имамы болып қызмет етіп келген Наурызбай қажы Тағанұлын әкеліп сіздердің алдарыңызда айтайын, таныстырайын деп отырмын. Өте тәжірибелі, білімді, осы біздің Орта Азияның, қазақ мұсылмандық мектебінің қалыптасқан жетік түлегінің бірі. Сол үшін Түркістан қаласының тағы да рухани, мәдени және діни орталық ретінде дамуы үшін осы біздің тарихи шешіміміз де тағы да оның салмағы мен маңызын арттыра түседі деп ойлаймын.    
Сонымен Түркістан қаласындағы Қазақстан мұсылмандары діни басқармасы өкілі болып Астанадағы Әзірет Сұлтан мешітінің бас имамы Наурызбай қажы Тағанұлы тағайындалды.