«PHOTOBAR» — тәуелсіз елдің фотошежіресін жасайды (фоторепортаж)

Adym.kz: Өнердің оңайы болмайды. Оған жетудің жолы машақатқа толы болмақ. Егер адам бойына өнер еңбексіз, ізденіссіз келсе оның ғұмыры да солай келте болмақ.
Кеңестік кезеңде «Зенит» фотоаппаратын ұстаған адамның төбесі көрінсе, ауыл-аймақ хан көргендей асты-үстіне түсіп жігжапар болатын. Апталап, айлап сол «таңсықты» күтетін.
Қазір рахат, технологиялық төңкеріс «сурет түсіргіш» құрылғыны кез-келгенге қолжетімді етіп қоя салды. Алайда, фотоаппарат арқалағанның барлығы кәсіби, деп ойламаңыз.
Бұл салада да бокстағыдай бөлініс бар. «Кәсіпқой», «Әуесқой». Фотообьективтері қас-қағым сәтті қалт жібермей «құлатып» тынса біріншісі, ал, қиыс кетіп, ауа қармап қалса соңғысы.
Міне, сондай кәсіби фотографтардың ізденісімен тәуелсіздік жылдары елімізде көптеген өнер ұжымдары құрыла бастады. Солардың бірі «Photobar» клубы. 2016 жылы елордамыз Астана қаласында белгілі фотограф Максим Рожин мен tengrinews.kz сайтының фототілшісі Тұрар Қазанғаповтың бастамасымен құрылған ұйымның қазіргі таңда 20- дан астам (Бұл құрам әлі де толығады дейді клуб құрушылары) мүшесі бар.
Фото әуелі өнер. Сосын, ол – тарих. Ал, сол «тарихты» жасаушылар – фотографтар. Сондықтан ғаламтор кеңістігінде байтақ отанымыз – Қазақстан туралы кездесер фотошежіре тым «жұпыны» болмауы керек. Оны жасаушылардың қанында отаншылдық колорит тасып тұруы шарт.
Осы қасиеттерді бойына сіңіре білген клуб мүшелерінің кез-келгені да өз ісінің шеберлері. Осы жылдың басында аталған клуб Астана қаласында өзінің бір жылдық есепті фото көрмесін өткізді. Нәтижесінде тәй-тәйлаған өнер ұжымының аты ел аузына ілініп үлгерді.
Мұнан бөлек, клуб мүшелерінің туындылары Астанадағы «ЭКСПО-2017» көрмесі мен АҚШ-тың Нью-Йорк қаласында өткен «PHOTO FEST KZ» халықаралық фотофестивалінде көрмеге қойылып, шетелдіктердің жоғары бағасына ие болды.
Жуырда кілең «шедевр» түсіретін Photobar-лықтар атап айтқанда Максим Рожин, Тұрар Қазанғапов, Дана Жұлдызбек, Руслан Хасанов және Мақсат Шағырбаев ішкі туризмді нәсихаттау үшін Оңтүстік Қазақстан облысына фототур ұйымдастырды. Қазыналы Оңтүстік Қазақстан туралы мағлұмат  іздеген оқырманға сапалы контент ұсынуды мақсат тұтқан «Снайперлер» апта бойы Күнгейдің көркі көз тартар көрікті мекендерін нысанаға алмақ.
Кезекті сапардың әлхисасы  тек еліміз ғана емес Кеңес тұсында алыс-жақын шетелдерге де танымал Байжансай  кен байыту кентінен басталды.
Назарларыңызға кәсіби фотографтардың Байжансайда түсірген туындыларын  ұсынамыз.

Нұршат ТӨКЕН,

Фото авторы: Мақсат ШАҒЫРБАЕВ.