Токиодағы жазғы Олимпиада ойындары аясында алғашқы жарыс басталды. Софтболдан Жапонияның әйелдер құрамы Аустралияны айқын басымдықпен жеңді, — деп хабарлайды ADYM.KZ Tengrinews.kz сайтына сілтеме жасап.
Басылым мәліметі бойынша, кездесу нәтижесі 8:1 есебімен аяқталған. Софтбол бәсекелері 21-27 шілде аралығында өтеді. Алты әйелдер командасы бір жүлде жиынтығын сарапқа салады. Ал ерлер бейсболда бақ сынайды.
Софтбол — бейсболдың бір түрі. Бұл спорт Олимпиада ойындарының бағдарламасына сирек енеді. Соңғы рет Олимпиада аясында 2008 жылы өткен.
Сондай-ақ, бүгін әйелдер командасы арасында футбол бәсекесі де басталады.
Токио Олимпиадасының ашылу салтанаты 23 шілдеге жоспарланған. Алайда жарыстар ашылу салтанатынан бұрын бастала береді. Бұл, әсіресе, командалық ойын түрлеріне тікелей қатысты.
