Оралда мейрамханалар мен дәмханалардың қызметкерлері қолдарында плакат ұстап, әлеуметтік желілерде суреттерін жариялап жатыр, — деп хабарлайды Tengrinews.kz сайтына сілтеме жасап.
Қоғамдық тамақтану орындарының қызметкерлері пандемия кезінде қиын жағдайға тап болғанын осылай жеткізді және жұмыс беруді талап етті.
Ал мейрамхана иелері мен кәсіпкерлер санитар дәрігердің қаулысы шыққаннан кейін жаңа талаптарға үйренісуге уақыт жетпей жатқанын айтты. Олар 20.00-ге дейін тамақтану нысандарына жұмыс істеудің мәні жоқ екенін түсіндірді, сондықтан ондаған адамды жұмыссыз қалдыруға мәжбүр.
«Біз жабылып, адамдарды таратуға мәжбүрміз», — дейді Орал кәсіпкерлері.
26 қаңтарда БҚО әкімі Ғали Есқалиев жедел штаб отырысында мейрамхана иелеріне карантин кезінде бизнесін үйірме немесе спорт залдарына қайта форматтауды ұсынған. Алайда кәсіпкерлер бұл идеяны қолдамады, себебі ғимараттары ондайға қарастырылмаған.
