Алашорданың 100 жылдығына арналған «Тар заман» телехикаясы 22 ақпаннан бастап еліміздің барлық кинотеатрларында көрсетіледі. Телехикая Қазақстан РТРК тапсырысымен түсірілген.
Көркем туынды орыс отаршылдығынан құтылып Ұлттық мемлекет құрамыз деген асыл арманға ұмтылған Алаш арыстарының рухына арналған. Фильм желісінде Алашорда үкіметін жасақтау жолындағы асыл мұратқа берік алаш зиялыларының өмірі туралы айтылады.
Телехикаяда Әлихан Бөкейхан, Ахмет Байтұрсынұлы, Міржақып Дулатұлы, Смағұл Садуақасұлы сынды алашшыл тұлғалардың көркем образдары бейнеленген.
Әсіресе, кинодағы бас кейіпкер Әлихан Бөкейханның күрескерлігі, айналасына топталған тарихи тұлғалармен байланысы, көзқарасы мен ұстанымы, махаббаты мен тағдыры көркемдік тұрғыдан толық көрніс тапқан. Өзара тартысты пікірлер арқылы алаш арыстарының арасындағы саяси қарым-қатынас, мүделлер қақтығысы дұрыс ашылған.
Әрі, Омбы мен Семейдегі оқиғалар, Алаш әскерінің құрылуы, Сталиннің Әлиханды Мәскеуге алдыруы, абақтыдағы тергеу істері де өз ретімен баяндалған.
Негізгі оқиғаға қазақ даласының Ақпан төңкерісін қалай қабылдап, Қазан төңкерісінен кейін қалай екіге бөлінгені арқау болады.
Фильмнің соңы Алаш көсемі Әлиханның ел мұратына жеткізер бес ұстанымын өскелең ұрпаққа аманаттауымен түйінделеді.
