Студенттер мен ұстаздар бас қосқан шараға ҚазҰПУ Басқарма төрағасы-ректор Болат Тілеп арнайы қатысты. Жастармен кездесуге ҚР Сыбайлас жемқорлыққа қарсы іс-қимыл Агенттігінің Алматы қаласы бойынша департаментінің басшысы Арман Рахимов та келді. Арман Тастемірұлы студенттерге сыбайлас жемқорлық тәуекелдерін болдырмау қайта оның алдын-алуға оған атсалысуға шақырды.
«Сыбайлас жемқорлыққа қарсы мәдениетті қалыптастыру білім беру процесінің ажырамас бір бөлігі болуы тиіс. Басты мақсат — адал, әділетті, ұлтжанды жанашыр және жемқорлықтан бойын аулақ ұстайтын ұрпақ тәрбиелеу» — деді қалалық Антикор басшысы Арман Рахимов. Сыбайлас жемқорлықпен күрес жолында тер төгіп жүрген Абай атындағы ҚазҰПУ-нің бірқатар мамандары мен студенттер Сыбайлас жемқорлыққа қарсы іс-қимыл департаментінің Алғыс хаты және де Құрмет грамоталарымен марапатталды.
«Біз университет қабырғасында ең әуелі жемқорлық, сыбайластық мәселесіне ең үлкен мән береміз.Бұл бағытта үлкен жұмыстар жүргізіліп жатыр. Себебі қоғамның қай саласын алып қарасаңыздар да, жемқорлық мәселесі бұл үлкен залал және зиян. Сыбайлас жемқорлық негізінен түбірімен жоқ болуы керек. 0 төзімділік болу керек. Қоғамда сыбайлас жемқорлық әуелі медицина саласы, екінші білім саласында. Білім саласының ішінде ертең мектепке барып, мұғалім болатын, педагог болатын азаматтар үшін бұл мәселе өте өзекті. Ұлттың болашағына тікелей әсер ететін қауіп» -деді жастарға қарата айтқан сөзінде ҚазҰПУ ректоры Болат Тілеп.
Жиында сондай-ақ университеттің Сыбайлас жемқорлыққа қарсы комплаенс-қызметінің жетекшісі Құрманғазы Мадиев сөз алып жыл бойы атқарған жұмысын баяндады. Сыбайлас жемқорлықтың алдын-алу тұрғысында алдағы атқарар мақсат-міндеттер сараланды. Өнерлі жастардан құралған Абай университетінің «Urker» студенттік театры көрерменге арнап «Көр» атты әлеуметтік драмасын сахналады. Қойылымның мақсаты мен айтар ойы жемқорлық жайлаған қоғамнан бойыңды таза жүріп, таза ұстауға үндеу болатын.
