Төлебиде 30 жас тұрғын 2,5 пайызбен несие алып, кәсіп ашқан

Жаңадан кәсіп бастағысы келетін яки кәсібін кеңейтуге ниетті жастарға 2,5 пайызбен несие беріліп, аталған жеңілдікке қол жеткізген 30 жас кәсіпкер ауданда өз кәсібін бастаған.

Бұған қоса, жаңа бизнес идеясын жүзеге асыру үшін 90 азамат «Бастау бизнес» арқылы қайтарымсыз грантқа ие болса, оның 32 -сі жастар. Мемлекет қамқорлығымен кәсібін бастаған жастардың бірі – Сапармұрат Орал. Кәсіпкер 2,5 пайыздық микрокредитке алғашқылардың бірі болып өтінім беріп, бизнес жоспар құрып, қазіргі таңда спорттық тауарлар жабдықталған өз дүкенін ашқан.

Кәсіпкер өз дүкеніне сұранысқа сай, кездесе бермейтін спорттық бұйымдарды арнайы Қытайдан тапсырыспен алдырады. Спорттық дүкенде салауатты өмір салтын өзіне серік еткендер қажетті барлық заттар бар.

Аудан аумағында тек спорттық жабдықтарға негізделген алғашы дүкенге деген сұраныс та артып келеді. Кәсібін кеңейтуді жоспарлаған кәсіпкер Қытай елімен тауар байланысын күшейтуді жоспарлағанын айтты.

Айта кетерлігі, Түркістан облысында «Нәтижелі жұмыспен қамту және жаппай кәсіпкерлікті дамыту» бағдарламасы аясында 300-ден астам кәсіпкерге несие берілген.

«Жалпы, осынау жұмыстарға биылға 3,282 млрд теңге қаралып, несие беру жұмыстары жүргізіліп жатыр. 2018 жылдың І жарты жылдығында атқарылған жұмыстардың ішінде «Ауыл шаруашылығын қаржылай қолдау қоры» АҚ арқылы 260 адамға несие берілсе (1 122,5 мың теңге), мұндағы 184 кәсіпкер мал шаруашылығымен айналысады. 6 пайыздық үстемемен 7 жылға берілген өзге де кредиттер жылыжай, жиһаз өндірісі және шаштараз кәсібіне бұйырды» делінген хабарламада.

«Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған» бағдарламасын іске асырудың екінші тармағы бойынша «Аграрлық несие корпорациясы» АҚ арқылы 64 адамға (201 652 мың теңге) 6 пайызбен 7 жылға несие рәсімделген. Оның 63-і — мал шаруашылығына қатысты бизнес болса, 1-еуі — жылыжай саласына тиесілі.

Одан бөлек, нәтижелі жұмыспен қамту, жаппай кәсіпкерлікті және кооперативтерді дамытуға республикалық бюджеттен қосымша 3 млрд теңгеге өтінім беріліп, оның 1,8 млрд теңгесі қолдау тапқан.