Шымкентте «Кедендік декларациялаудың кейбір ерекшеліктері» тақырыбында жиын өтті

178

Бүгін Шымкент қаласы бойынша Мемлекеттік кірістер департаментінің басшысы Нұралхан Көшеровтің төрағалық етуімен және «Нұр Отан» саяси партиясының Шымкент қаласы филиалының төраға орынбасары Бегайдар Төлегенов, «Атамекен» Шымкент қаласы бойынша кәсіпкерлер палатасы директорының орынбасары Дармен Данияр, жауапты мамандарының қатысуымен сыртқы экономикалық қызметке қатысушыларға арналған (СЭҚ саны-30) «Кедендік декларациялаудың кейбір ерекшеліктері» тақырыбында дөңгелек үстел өтті, деп хабарлайды Adym.kz ақпарат агенттігі.
Шараны Департамент басшысы Н.Көшеров кіріспе сөзбен ашты. Ол өз сөзінде: «Елбасы Н.Ә.Назарбаевтың «Ұлт жоспары – бес институционалдық реформаны жүзеге асыру жөніндегі 100 нақты қадам» бағдарламасының 38 қадамында экспорттық және импорттық кеден рәсімдерінен өту кезінде «бір терезе» қағидатын енгізу, электронды жария ету жүйесін дамыту (тауарларды кедендік тазалауға автоматтандырылған жүйені енгізу), экспорт және импорт үшін құжаттар санын және оларды өңдеу уақытын қысқарту» тапсырылғандығын атап өтті.
Ұлт жоспары мен «Цифрлы Қазақстан» бағдарламасын жүзеге асыру мақсатында Қазақстан Республикасының «Қазақстан Республикасындағы кедендік реттеу туралы» кодексімен Еуразиялық экономикалық одақтың кеден шекарасы арқылы өткізілетін тауарларға декларацияны ұсыну міндетті түрде электрондық түрде жүзеге асырылуы қарастырылған.
Аталған жүйенің негізгі мақсаты кедендік ресімдерді жылдамдату, сыртқы экономикалық қызметке қатысушылардың уақыттық және қаржылай шығындарын қысқарту, электронды декларациялау жүйесін енгізу, құжаттар санының қысқаруына мүмкіндік туғызу, алдын-ала ақпаратты ұсыну және кедендік декларацияны шығару, ең бастысы кеден органы мен сыртқы экономикалық қызметке қатысушылардың тікелей қатынасын қысқарту арқылы сыбайлас жемқорлық көріністерін азайту болып табылады.
Әрі қарай кеден саласының бірқатар мамандары баяндама жасады. Атап айтсақ, «Тауарларды шартты түрде шығаруды қолдану және кедендік декларацияларды кері қайтару тәртібі туралы» — Кедендік бақылау басқармасының басшысы Т.Тұрғанбаев; «Кедендік құн мәселелері бойынша кеңес берулердің мерзімі мен ережесі туралы» — Тарифтік реттеу басқармасының басшысы А.Саметова; «АСТАНА-1» ақпараттық жүйесінде жұмыс жасау үшін сыртқы қолданушыларды тіркеу тәртібі туралы» — Кедендік бақылау басқармасының жетекші маманы А.Иманалиев.
«Дөңгелек үстел» соңында қатысушыларға «АСТАНА-1» ақпараттық жүйесінде жұмыс жасаудың негізгі ерекшеліктері, басшылардың азаматтарды қабылдау күні және кеден бекеттерінің байланыс сымтетіктері көрсетілген брошюралар үлестірілді.
Іс-шара жоспарланған бағдарлама аясында, ұйымдастырушылар мен сыртқы экономикалық қызметке қатысушылардың белсенді пікір алмасуы арқылы сәтті өткізілді.