Ордабасы ауданында 3 мектептің құрылысы басталды

Ордабасы ауданының орталығы Темірлан ауылында үш мектептің құрылысы басталды, деп хабарлайды Adym.kz ақпарат агенттігі аудан әкімінің баспасөз қызметіне сілтеме жасап.
Қазіргі таңда аудан орталығындағы Амангелді Иманов атындағы және «Темірлан» жалпы орта мектептері үш ауысымда білім беруде. «Темірлан» мектебінің 600 орындық жаңа ғимаратының құрылысын «А.Р.Т. -Құрылыс» жауапкершілігі шектеулі серіктестігі жүргізуде. Бүгінге дейін бұл мектептің оқушылары ыңғайластырылған ғимаратта білім алып келді. Ал, Байкал аумағынан салынатын 300 орындық мектеп Амангелді Иманов атындағы мектептегі үш ауысымдық оқыту мәселесін шешеді деп күтілуде.
Бұл мектеп 640 балаға арналған, қазіргі таңда 1542 оқушы білім алуда. Мұндағы құрылыс жұмыстарын «МТС-Төлеген» жауапкершілігі шектеулі серіктестігі жүзеге асыруда. Сонымен қатар, аудан орталығынан 600 орындық тағы бір типтік мектеп құрылысын «Авторемстрой ЛТД» жауапкершілігі шектеулі серіктестігі бастады. Бұл үш нысан 2019 жылы пайдалануға беріледі деп жоспарланған.
Нысанндар сапалы әрі белгіленген уақытында аяқталса, ата-аналар мен оқушылардың, мектеп ұжымының қуанышына орай нұр үстіне — нұр болар еді.
Елбасының бастауыш, орта білім беру мекемелерінің санын арттырып, жас ұрпақтың алаңсыз білім алуына шарт-жағдай жасау керек деген тапсырмасына орай Ордабасы ауданында алдағы уақытта әлі талай іргелі білім ордалары салынады дейді сала мамандары.