Шымкенттік ауданда медиаторлармен ашық есік күнін өткізді. Шымкент қаласы Қаратау ауданында Республикалық «Медиация күні» акциясы аясында кәсіби және кәсіби емес медиаторлордың қатысуымен аудан тұрғындарына арналған ашық есік күні өткізілді.
Аталған іс-шара барысында кәсіби медиатор – Нұрханов Нұрбол Нұрланұлы келуші тұрғындарға медиация жайлы толық түсініктеме берді.
Сондай-ақ, ашық есік күні шеңберінде медиаторлар тарапынан келушілерге тегін кеңестер ұйымдастырылып, медиация кабинеттерінің орналасқан орны мен телефон нөмірлері көрсетілген арнайы парақшалар таратылды.
Естеріңізге салар болсақ, медиация, медиатор деген ұғымдардың елімізде пайда болуына Қазақстан Республикасының 2011 жылғы 28 қаңтарда шыққан «Медиация туралы» заңы себепкер болды. Заң мәтіні 2011 жылы ақпан айының басында «Егемен Қазақстан» және « Казахстанская правда» газеттерінде басылды, қолданысқа алты айдан кейін, 2011 жылдың тамыз айында енгізілді. Медиация термині латын тіліндегі геометриялық ұғым «медиана» – орта сызық деген сөзден шыққан. Қазақы ұғымға сәйкестендірсек, медиатор – екі жаққа да ортақ, дау-дамайда айтысушы жақтарды мәмілеге келтіріп, тең шешетін ара ағайындық жасау.
