ҮШІНШІ МЕГАПОЛИСТІҢ АУДАН ӘІМДЕРІ ТҰРҒЫНДАРМЕН КҮНДЕЛІКТІ КЕЗДЕСІП ТҰРАДЫ

"Шымкент қаласының әкімі Ғабидолла Әбдірахымов әкімдік жиналысында төрт аудан әкімдерін тұрғындармен күнделікті кездесіп тұруға шақырды", деп хабарлайды Adym.kz  ақпарат агенттігі қала әкімдігінің баспасөз қызметіне сілтеме жасап.

530
Аудан әкімдері халықпен жаңа кесте бойынша жұмыс істейтін болады. Бұған дейін аптасына бір рет азаматтарды қабылдап келген аудан әкімдері ендігі жерде халықпен күн сайын кездеседі. Қала активінің отырысында шаһар әкімі Ғабидолла Әбдірахымов осындай тапсырма берді.
Ғабидолла Әбдірахымов, Шымкент қаласының әкімі:
— Бұрын азаматтарды аптасына бір рет  белгіленген кесте бойынша қабылдап келген болсаңыздар, ендігі жерде күн сайын таңертеңгі сағат 9:00-10:00 аралығында  жергілікті тұрғындармен кездесу ұйымдастыратын боласыздар. Яғни, тұрғындар өздерін толғандырған өзекті мәселелер бойынша аудан әкімінен тікелей жауап ала алады. Қарапайым халықпен көбірек жұмыс жасаңыздар. Егер тұрғындардың сенімін ақтасаңыздар, дұрыс жұмыс жасағандарыңыз. Халықтың сенімін ақтау — жұмыстың басты көрсеткіші.
Қала əкімі, сондай-ақ, аудан басшыларына өздеріне сеніп тапсырылған аумақтағы халықтың өмір сүру сапасына жеке жауапты екендерін де ескертіп өтті.
Айта кетерлігі, Шымкент қаласының әкімі Ғабидолла Әбдіраxымов осыдан ілгері шаһарға қосылған елді мекендердің тұрғындарымен кездесіп, пікірлесіп отырған.