Серіктестік басшысының айтуынша, құрғақ саумалдың құрамында адам денсаулығына пайдалы микроэлементтер мен дәрумендер көп болады. Жаңа өнім сапасы жағынан табиғи саумалға ұқсайды.
«Алдағы уақытта немістің «Zollmann Stutenmilch GmbH» компаниясымен бірлесіп, косметология, балалар мен спортшыларға арналған тағамдарды шығарамыз. Қазір меншігімізде 15 мың гектардан аса жайылым, 1 мыңнан аса көшім жылқысының тұқымы бар. Өндірісті жолға қоюдың бастапқы кезеңінде өндірістік цехты, әкімшілік ғимаратты пайдалануға беру іске асырылды. Салқындатқыш танктер, пастеризатор, 100 литрлік сублиматор, сауу жүйесі іске қосылды. Болашақта өнімді өндіру қуатын жылына 40 тоннаға дейін арттыруды, 150 жұмыс орнын құруды жоспарлап отырмыз. Жобаның жалпы құны – 10 млрд теңге. Мұның сыртында 400 бас ірі қараға арналған сүт фермасын ашуды жоспарлап отырмыз. Мұнда жылына 4 млн 500 мың литр сүт өндіреміз», дейді «S-Agro-Borovskoe» ЖШС директоры Мейрам Ахметжанов.
Серіктестік қолға алып отырған бірегей жоба неміс технологиясына негізделген. Неміс кәсіпкерлері Ганс Цольман мен Рудольф Шторх осыдан 48 жыл бұрын қымыз өндірісін жолға қойып, өзі ойлап тапқан қымыз дайындау әдісін патенттеп алған екен.
М.Ахметжановтың айтуынша, өткен ғасырдың 60-жылдары Батыс Еуропа ғалымдары қымыздың адам ағзасына пайдасын жаппай зерттей бастаған. Бұл зерттеулердің нәтижесінде бие сүтінің өкпе, асқазан ауруларын емдеуге, иммунитетті көтеруге оң әсер ететіні анықталған. Цольмандар әулеті осы тұжырымдарды әрі қарай дамытып, бие сүтінің аллергиясы бар балаларға аса пайдалы екенін дәлелдеп шыққан.
