Қазақстандық режиссер Фархат Шәріповтың «18 килогерц» картинасының қоржыны тағы бір жүлдеге толықты. Фильм Котбуста (Германия) өткен 30-шы Халықаралық кинофестивальде үздік атанды , — деп хабарлайды ADYM.KZ Tengrinews.kz сайтына сілтеме жасап.
Картина Youth Film Competition конкурстық бағдарламасында көрсетілді. Котбустағы мерейтойлық кинофестиваль жеңімпаздары 12 желтоқсанында кешке онлайн марапаттау рәсімінде жарияланды.
Биыл алғаш рет сандық кеңістікте өтіп отырған Шығыс Еуропадағы ең үлкен кинофестивальге 150-ге жуық фильм ұсынылғанын айта кеткен де жөн.
«18 килогерц» фильмі — 90-шы жылдардың соңындағы жасөспірімдердің өмірі баяндалатын көше тарихы. Фильмдегі басты рольдерді дебютант актерлер сомдаған: Мұсахан Жұмахан, Әлібек Әдікен, Камила Фун-Со. Кинокартина 2020 жылдың қазанында сенсациялық түрде 36-шы Варшава Халықаралық кинофестивалінің гран-приін жеңген болатын.