Түркістан облысында кортеж ұйымдастырғандар жауапкершілікке тартылды, — деп хабарлайды облыстық полиция департаменті.
Осыған дейін әлеуметтік желілерде жол қауіпсіздігі ережелерін бұзған кортеждің видеосы тараған еді. Тексеру кезінде видеоның Түркістан облысының Төлеби ауданында түсірілгені анықталды.
«Тәртіп бұзушылардың аты-жөнін анықтау мақсатында Төлеби аудандық полиция бөлімі барлық қажетті шараны жүргізіп, жүргізушілерді әкімшілік жауапкершілікке тартты. Олардың Төлеби ауданынан Қазығұрт ауданына бара жатқанын белгілі болды», — деді полицейлер.
«Мерседес» жүргізушілері ҚР Әкімшілік құқық бұзушылық туралы кодекстің 593-бабы және 601-бабы бойынша әкімшілік жазаға тартылды. Ал ВАЗ бен «Лада» автокөліктері енді айыппұл тұрағына жеткізіледі деді полицейлер.
