Түркістанда наурыз-мамыр айлары аралығында 45590 ағаш отырғызылса, 76635 ш. м көгал төселді. Оның ішінде «Қашқари» сквері, «Тікұшақ» алаңы және Б. Саттарханов даңғылы, Әл Фараби, Жібек жолы, Майкөтов, Тұтқабаев, көшелері көгалданды. Жалпы, 15 км көшеде көгал егу жоспарланса, соның 11,1 км-і толығымен аяқталған.⠀
Ал, 3 сектор бойынша «Жасыл белдеуде» талшын, катальпа, кул ағашы, үйеңкімен қатар, қараөрік, шие, тұт, өрік сынды жеміс ағаштары егілді.⠀Экология мен денсаулыққа әсер етер жасыл желектер үш түрлі суару әдісімен жүргізілуде. Олар: арнайы суару техникасы (водобоз), тамшылатып және жаңбырлатып суару арқылы іске асуда.⠀
Қаланы көркейтудегі жұмыстар қажырлы еңбек пен үлкен жауапкершілікті талап етеді. Алғашқыда жерді тегістеу, қоқыстардан тазарту, жаңадан топырақ төсеу секілді жұмыстар атқарылып, ағаштар мен бұталар егілетін орындар қазылады, органикалық (көң т.б.) және минералды тыңайтқыштар беріледі.⠀
Газон төсеуде де осындай жұмыстар жүргізіледі. Сондай-ақ, суару, тұрақты кесу, қырқу, түрлі зиянкестер мен аурулардан сақтайтын дәрілеу жұмыстары атқарылады.⠀
Ауа-райының қолайсыздығы да жасыл желектерге кері әсерін тигізетіні сөзсіз. Сол себепті, жұмысшылар тек ағаш отырғызып қоймай, оның көктеп, гүлденіп, тұрғындарға қолайлы орта сыйлауына деген жауапкершілік міндетін сезінеді.
Түркістанда демалыс орындары көбейіп, көгалдандыру жұмыстары қарқынды жүргізілуде. Бұл орайда қала аумағында 250 мың ағаш көшеттері мен бұталар отырғызылған. Тұт ағашы, писсар өрігі, терек, арша, линден ағашы, қарағай, катальпа, талшын егілген.
Қаланың экологиялық жағдайын жақсарту мақсатында ең озық технологиялар қолданылуда. Арнайы сұйықтық шашылғаннан кейінгі жеті күнде айнала жасыл желекке бөленеді. Ал «Жасыл белдеу» бағдарламасы бойынша 97,9 гектар аумаққа 42068 дана ағаш егілген. «Қашқари» демалыс орнында 200 түрлі ағаштар мен бұталы гүлді өсімдіктер отырғызылған. Қазіргі кезде қаланың 19 көшесінде көгалдандыру мен абаттандыру жұмыстары іске асуда.
